Vierde persoon soek ná nagklub-brand
2013-01-29 07:05
Santa Maria – 'n Vierde persoon word gesoek in verband met 'n brand by 'n nagklub in Brasilië, wat die lewe van meer as 230 mense geëis het.
Drie mense is reeds in verband met die voorval in hegtenis geneem.
Insp. Ranolfo Vieira Junior het Maandag op 'n mediakonferensie gesê die mense is vir ondersoekdoeleindes in hegtenis geneem en kan net vyf dae lank aangehou word.
Hy wou nie die drie mense se name bekendmaak nie.
Jader Marques, 'n prokureur, het aan die Zero Hora-koerant gesê sy kliënt, Elissandro Spohr, 'n mede-eienaar van die klub, is in hegtenis geneem. Die koerant berig verder dat twee lede van die rockgroep wat by die nagklub opgetree het, ook in hegtenis geneem is.
Meer as 230 mense is Sondag dood in die brand. Die oorsaak van die brand is nie bekend nie, maar daar is berig dat die brand kort ná 02:00 uitgebreek het terwyl 'n universiteitspartytjie aan die gang was. 'n Rockgroep, wat vermoedelik vuurwerke gebruik het, het by die partytjie opgetree.
Begrafnisdienste het Maandag in die stad van Santa Maria begin.
– Volg Nuus24 op Twitter
- Sapa - AP
