Vier sterf toe gebou binne sekondes tuimel
2010-01-30 11:54
Hong Kong-’n Vierde liggaam is Saterdag onder die puin van ’n gebou in Hong Kong verwyder nadat dit weens oudheid ineengestort het.
Dit kom enkele dae nadat die regering beveel het dat alle geboue ouer as 50 jaar ondersoek moet word.
Dié gebou van 50 verdiepings hoog wat in 1950 gebou is, het binne sekondes in die Kowloon distrik ineengestort, het ooggetuies aan plaaslike televisiestasies gesê.
Reddingswerkers het vroeg Saterdagoggend die liggaam van 'n vrou verwyder nadat 'n volledige ondersoek plaasgevind het.
"Sy is dood op die toneel verklaar," het reddingswerkers luidens 'n verklaring gesê. Tot dusver het vier mense gesterf en sowat twee het ernstige beserings opgedoen.
Die gebou het restourasiewerk ondergaan, maar die oorsaak van die voorval is steeds onbekend.
Talle geboue is om veiligheidsredes gesluit en sowat 'n 100 inwoners het weens die voorval in gemeenskapsale oornag.
Au Choi-kai, die direkteur van geboue het gesê die eienaars van die geboue in die gebied is beveel om herstelwerk toe te pas, maar die skade was nie van so 'n aard dat hulle nodig gehad het om die gebou toe te maak nie, het RTHK, 'n plaaslike nuusstasie berig.
Carrie Lam, die sekretaris van ontwikkeling het beveel dat alle geboue oor 50 jaar, ondersoek moet word.
"Ek het stukke teëls en sement van die mure sien losbreek en 'n vrou wat besig was om uit 'n venster te ontsnap en 15 sekondes later het die geboue heeltemal in mekaargesak," het 'n ooggetuie aan die nuuskanaal gesê.
-Sapa-AFP