Vier sterf in ontploffing by myn
2010-03-04 04:20
Tbilisi – Vier mynwerkers is Woensdag dood en verskeie ander beseer in ‘n ontploffing by ‘n steenkoolmyn in die voormalige Sowjetrepubliek van Georgië, het plaaslike media berig.
Die ontploffing wat by Tkibuli in die weste van Georgië plaasgevind het, is volgens voorlopige inligting deur ‘n metaan-lekkasie veroorsaak, het Rustavi-2 televisie en die Interpress nuusagentskap berig.
Verskeie mynwerkers is beseer en minstens een is in ‘n kritieke toestand.
- Sapa-AFP