Vier skubaduikers sterf in grot in Italië
2012-07-01 08:53
Rome – Vier skubaduikers is dood nadat hulle vasgekeer is in ‘n grot op Italië se suidwestelike kus, het amptenare Saterdag gesê.
Die drie mans en een vrou was deel van ‘n groter groep wat Bloed-grot, een van ‘n reeks onderwatergrotte wat gewild is onder amateurduikers, gaan verken het.
Verskeie lede van die groep kon daarin slaag om uit die grot in die Golf van Salerno, wat naby die klein hawe van Palinuro is, te kom, het amptenare gesê. Die vier – drie Italianers en een Griek – is agtergelaat.
Die polisie het die Italianers geïdentifiseer as Andrea Pedroni en Douglas Rizzo, beide 40 en van Rome, en Susy Govaccini (36) van Salerno.
Rizzo, die groepleier, was die pa van ‘n sewe maande oue baba.
Panaghiotis Telios, ‘n 23-jarige man van die suide van Calabria, is ook dood.
Geen amptelike verduideliking is gegee vir die tragedie nie, maar reddingswerkers en lede van die groep wat dit veilig uit die grot gemaak het, vermoed die duikers kon moontlik veroorsaak het dat groot hoeveelhede sand geskuif het soos wat hulle deur die grot se verskeie gangetjies geswem het.
Dit het moontlik hul sigbaarheid bemoeilik en daartoe gelei dat hulle verdwaal het.
Die groep se duikinstrukteur het oorleef.
– Volg Nuus24 op Twitter
- Sapa - AFP
