Vier dood in Russiese vliegongeluk

2012-12-30 10:40

Moskou – Minstens vier mense is dood nadat ‘n passasiersvliegtuig Saterdag by Rusland se derde besigste lughawe van die aanloopbaan gegaan het.

Die vliegtuig het gedeeltelik op ‘n hoofpad beland en het in stukke gebreek en aan die brand geslaan.

Volgens beamptes was daar agt mense aan boord die Tu-204 wat aan die Russiese lugredery Red Wings behoort.

Daar was geen passasiers aan boord die vliegtuig wat teruggevlieg het van die Tsjeggiese Republiek na die Vnukovo-lughawe nie.

Nooddienswerkers het in ‘n nuuskonferensie op die televisie gesê vier mense is dood en vier ander is ernstig beseer toe die vliegtuig van die aanloopbaan beweeg en in ‘n sneeubedekte veld en gedeeltelik op ‘n hoofpad beland het.

Geen botsings met motors op die pad is aangemeld nie.

Die ongeluk het te midde ligte sneeu en winde van tot 48 km/h plaasgevind, maar ander besonderhede was nie onmiddellik bekend nie.

Vladimir Markin, ‘n woordvoerder vir Rusland se top-ondersoekagentskap, sê aanvanklike aanduidings toon dat die ongeluk veroorsaak is deur ‘n fout deur die vlieënier.

– Volg Nuus24 op Twitter


 

- Sapa - AP