Verwoestende aardbewing skud Haïti
2010-01-13 07:57
Haïti – Binne sekondes is Haïti in chaos gedompel nadat ’n verwoestende aardbewing laat Dinsdagaand die land getref het.
Duisende inwoners het uit vrees uit die land se hoofstad Port-au-Prince gevlug met die hoop om die angswekkende aardbewing wat 7.0 op die Richterskaal weeg, te ontsnap.
Daar word egter gevrees dat honderde inwoners gesterf het en steeds onder die puin van die geboue begrawe en vasgekeer is.
Dit is die hoeveelste tragedie wat die gebied in die Karibiese Eilande tref nadat 'n reeks natuurrampe in 2008 plaasgevind het.
"Die middestad van Port-au-Prince is verwoes, dit is katastrofies,” het een van die inwoners van die stad gesê.
Die aarbewing het sowat 60 sekondes geduur, maar het verwoestende nagevolge gehad.
Talle inwoners is na oop spasies soos sportgronde gelei om enige verdere beserings van stortende geboue te vermy.
Reddingspogings is vetraag nadat die aardbewing alle kommunikasiepunte doodgelaat het.
Die skudding het ongeveer 21:53 plaasgevind.
Ooggetuies het gesê dat die presidensiële paleis, asook hospitale, hotelle en skole eenvoudig ineengestort het.
Die aardbewing is tot in Kuba gevoel, maar die meeste skade het in en rondom Haïti plaasgevind.
Die Haïtiaanse polisie, asook die Verenigde Nasies en die Rooikruis het beseerdes tot hulp gesnel.
- Sapa-AFP