Verroeste stuk lem ná 4 j. uit skedel
2011-02-19 10:30
Beijing – Vier jaar lank het ’n man met allerhande onverklaarbare gesondheidsprobleme gesukkel.
Erge hoofpyn en asemhalingsprobleme het Li Fuyan (30) opgekeil. En boonop het sy asem sleg geruik.
Toe kom dokters agter waar die probleem lê: In sy kakebeen, waar ’n 10 cm lange meslem duidelik op x-straalfoto’s te sien was.
Li het aan dokters gesê ’n rower het hom vier jaar gelede met ’n mes in die kakebeen gesteek.
Die lem het in sy kop afgebreek, maar hy het dit nooit besef nie.
Li is in die Yuxi-stadshospitaal in Yunnan, China, geopereer om van die probleem ontslae te raak.
Dokters moes versigtig werk om die erg verroeste lem te verwyder sonder dat dit versplinter, maar het daarin geslaag, het ’n hospitaalamptenaar gesê.
Sapa-AP