'Vermiste' vrou soek toe eintlik na haarself

2012-08-31 22:34

Reykjavik – ‘n Vrou wat vermis geraak het tydens ‘n toer deur Ysland het onwetend by ‘n soekgeselskap aangesluit wat besig was om na haar te soek.

Volgens die Reykjavik Grapevine is ‘n vrou Saterdagoggend naby die Eldgjá- vulkaniese krater in die suide van Ysland as vermis aangemeld.

'n Soekgeselskap is uitgestuur ná die vrou glo saam met 'n toergroep op 'n bus geklim het en nie weer gesien is nie, het Yahoo News berig.

Dit het later aan die lig gekom dat die vrou by ‘n bushalte ander klere aangetrek het. Niemand het haar herken toe sy weer op die bus geklim het nie.

'n Beskrywing van 'n "vermiste" vrou is later uitgereik, maar die vrou het nie haar eie beskrywing herken nie. Sy het besluit om by die soekgeselskap aan te sluit.

Sowat 50 mense het die gebied deursoek, en ‘n helikopter is op bystand geplaas.

Die vrou het uiteindelik besef dat sy heel moontlik die vermiste persoon kan wees waarna almal soek, en sy het by 'n polisiestasie aangemeld om te sê sy is veilig.

Dit is nie duidelik wanneer en hoe die groep besluit het 'n passassier word vermis nie.

– Volg Nuus24 op Twitter