Verkiesing in VSA: Eerste skote klap
2012-01-03 08:47
Washington – Die eerste skote in die Amerikaanse presidentsverkiesing word vandag gevuur wanneer Republikeinse kandidate mekaar in die benoemingstryd in die deelstaat Iowa aanvat.
Goew. Mitt Romney van Massachusetts is die vroeë voorloper om as dié party se presidentskandidaat aangewys te word om pres. Barack Obama uit te daag, hoewel die voormalige speaker van die huis van verteenwoordigers, Newt Gingrich, ook ’n sterk aanspraakmaker is.
Die benoemingstryd in Iowa word saam met dié van New Hampshire tradisioneel beskou as ’n aanduiding van hoe die res van die benoemingstryd kan verloop. Obama het die Demokrate se Iowa-koukus in 2008 gewen.
Volgens die laaste groot meningspeiling voor vandag se koukus, deur die koerant Des Moines Register, geniet Romney die meeste steun (24%), maar het Gingrich van die tweede plek tot die vierde teruggesak. Ron Paul, ’n kongreslid van Texas, is tweede en Rick Santorum, ’n voormalige senator, derde.
Die Iowa-koukus is oop vir enige geregistreerde Republikeinse ondersteuner. Die wenner word aangewys ná intense debatvoering oor kandidate se bevoegdhede en stemming deur almal wat dit bywoon.
Prof. Allan Lichtman van die American University in Washington het op ’n nuuskonferensie gesê dit lyk of die resies op die ou einde tussen Gingrich en Romney sal wees.
Daar is egter toenemend vrese dat nie een van hulle die skietgoed het om die president uit die kussings te lig nie. Dit is opvallend dat Obama óf gelyk óf net voor is wanneer hy met moontlike uitdagers vergelyk word, ondanks wye ontevredenheid oor sy bestuurstyl en die ekonomie.
“Dit gaan in der waarheid nie sleg met Amerika nie. Obama het van Osama bin Laden en Muammar Gaddafi ontslae geraak, Libië is bevry, ons het uit Irak padgegee en daar was geen groot rampe met buitelandse beleid nie. Dít is die soort omstandighede waarin presidente herkies word.”
Romney word nie heeltemal deur die Republikeinse basis vertrou nie omdat hy ’n Mormoon is en nie “eg-konserwatief” is nie.
Aan die ander kant: Gingrich was al drie keer getroud en sy persoonlike lewe is in omstredenheid gehul.
– Bronne: Bloomberg, www.politico.com, Des Moines Register en www.state.gov