Verkeerde tweeling word geaborteer
2011-11-24 10:10
Melbourne – ‘n Australiese hospitaal het Donderdag met ‘n ondersoek begin nadat die verkeerde fetus van ‘n vrou wat swanger was met ‘n 32 week oue tweeling geaborteer is.
Dokters het aan die vrou gesê dat een van die seuns, wat sy reeds 'n naam gegee het, ‘n oorerflike hartdefek het wat daartoe sal lei dat hy jare lange operasies sal moet ondergaan, indien hy dit oorleef, het die Herald Sun berig.
Die vrou het die moeilike besluit geneem om die kind te laat aborteer – maar die verkeerde baba se lewe is Dinsdag beëindig.
Die vrou moes gevolglik ‘n lang keisersnee-operasie by die Royal Women’s-hospitaal in Melbourne ondergaan waartydens die lewe van die siek fetus ook beëindig moes word.
“Die Royal Women’s-hospitaal kan bevestig dat ‘n kliniese ongeluk Dinsdag plaasgevind het,” het die hospitaal in ‘n verklaring gesê.
“Dit is ‘n verskriklike tragedie en die hospitaal is innig jammer vir die verlies wat die pasiënt en haar familie moes ly.
‘n Vriend van die vrou het aan die koerant gesê dat die familie sukkel om dit te hanteer.
“Sy het na die hospitaal gegaan met twee babas en nou het sy niks. En sy moes deur die hartbrekende proses gaan om geboorte te skenk aan haar siek baba. Sy is getraumatiseer,” het sy gesê.
“Die hospitaal het gesê hy het die regte prosedure gevolg, maar hoe kon dit gebeur?”
Die familie het later ‘n verklaring uitgereik waarin hulle vir privaatheid gevra het.
“Ons waardeer die publiek se belangstelling in wat gebeur het, maar ons sou verkies het as die Herald Sun se joernalis wat die nuus van ons tragedie gebreek het ons versoek gerespekteer het en nie die storie gepubliseer het nie,” het hulle gesê.
– Volg Nuus24 op Twitter