Verdagte in bendeverkragting wel minderjarig

2013-01-28 16:45

Nieu-Delhi – Een van die ses verdagtes in die bendeverkragting-saak waarin ‘n 23-jarige student in Nieu-Delhi dood is, is ‘n minderjarige, het ‘n raad in Indië Maandag beslis.

Hy sal in ‘n hof vir jeugdiges verhoor word.

Die raad het ‘n sertifikaat wat deur beamptes van die skool ingedien is, aanvaar wat sê die verdagte was 17 jaar en ses maande oud ten tyde van die aanval.

“Hy is jonger as 18. Die raad het beslis dat die sesde beskuldigde ‘n minderjarige is op grond van die geboortedatum op sy skoolsertifikaat,” het Ishkaran Singh Bhandari, ‘n prokureur wat teenwoordig was in die hof toe die landdros die besluit aangekondig het, aan joernaliste gesê.

Aanklaers sê hulle sal die besluit in ‘n hoër hof appelleer, het plaaslike media berig.

As ‘n minderjarige kan die verdagte ‘n maksimum van drie jaar by ‘n korrektiewe dienste-fasiliteit uitdien.

Aanklaers sê hulle sal vra vir die doodstraf vir die ander vyf verdagtes wat tereg staan op aanklagte van moord, verkragting, ontvoering en die vernietiging van bewyse.

– Volg Nuus24 op Twitter

 

- Sapa-DPA