Venezuela waarsku oor Chavez se herstel

2012-12-13 16:45

Caracas – Nicolas Maduro, adjunkpresident van Venezuela het gewaarsku dat die land ‘n moeilike pad het om te loop met pres. Hugo Chavez se herstelproses.

Chavez het ‘n operasie ontvang na hy oor die naweek aangekondig het dat sy kanker teruggekeer het. Chavez se operasie in Havana was ‘n sukses.

Maduro het egter Woensdag gesê dat Chavez se operasie ‘n komplekse, moeilike en delikate proses was.

“Dit sê vir ons dat sy herstelproses ook kompleks en moeilike sal wees,” het Manduro gesê.

Hy het bygevoeg dat die land voorbereid moet wees vir ‘n moeilike situasie wat voorlê.

Die adjunk het nie bekend gemaak wanneer Chavez na Venezuela sal terugkeer nie.

Chavez se tipe kanker word al die afgelope 18 maande lank geheim gehou wat gerugte en onsekerheid onder burgers kweek.

Kanker is die eerste keer in Junie 2011 by die president gediagnoseer. Hy het tydens sy verkiesingsveldtog volgehou dat hy kankervry is ná drie operasies, chemoterapie en bestraling.


– Volg Nuus24 op Twitter
 

- Sapa - AFP