Venezuela: Minstens 50 dood in gevegte by tronk
2013-01-26 10:23
Caracas – Tientalle mense is dood in geweld by ‘n tronk in Venezuela, het die land se media berig, terwyl die regering sê hy ondersoek die voorval.
Die land se vise-president, Nicolas Maduro, het vroeg Saterdag op die televisie gesê die geweld was tragies en sê amptenare het met ‘n ondersoek begin.
Hy en ander beamptes kon nie ‘n bevestigde dodetal gee van die voorval wat Vrydag by die Uribana-tronk in die stad Barquisimeto uitgebreek het nie.
Die koerant Ultimas Noticias het op sy webwerf berig dat 54 mense dood is. Die televisiestasie Globovision het berig dat minstens 50 mense dood en 90 beseer is. Beide het Ruy Medina, die direkteur van die Sentrale Hospitaal in die stad, aangehaal.
Iris Varela, die minister van korrektiewe dienste, het vroeër op die televisie gesê gevegte het uitgebreek toe groepe gevangenes troepe van die Nasionale Wag, wat ‘n inspeksie probeer uitvoer het, aangeval het.
– Volg Nuus24 op Twitter
- Sapa - AP
