Veertig Taliban-rebelle in Pakistan gedood
2011-06-30 11:31
Islamabad – Pakistanse magte het Donderdag gesê hulle het ‘n strategies belangrike gebied naby die Afgaanse grens teruggeneem ná hulle 40 Taliban-rebelle daar gedood het.
Die gevegte om die Shankarao-gebied waar Pakistanse magte met Taliban- en al Kaïda-magte gebots het, het drie dae geduur.
Brig. Aftab Ahmed van die gebied se Frontier-korps het gesê die Taliban het 115 landmyne in ‘n 75 m lange gebied langs die Afgaanse grens gelê.
“Die landmyne is ontlont,” het hy gesê.
Volgens Ahmed het al 40 rebelle die land vanaf Afganistan binnegekom om die gebied te beset.
“Gewapende Pakistanse weermaghelikopters het ons bygestaan,” het hy bygelas.
Honderde Taliban-rebelle wat uit Pakistan verjaag is het skuiling in oos-Afganistan gaan soek.
Hulle het in die afgelope maande aanvalle oor die grens op klein dorpies en Pakistanse basisse geloods.
– Volg Nuus24 op Twitter.
- Sapa-DPA