Varkgriep-dodetal in Mexiko nou 9

2012-01-23 11:01

Mexiko-Stad – Die dodetal in Mexiko na ‘n uitbraak van varkgriep het na nege gestyg en altesaam 573 gevalle van mense met dié virus is aangemeld, het beamptes Sondag gesê.

Die stam stel sowat 90% van vasgestelde gevalle van griep in die land voor, het die departement van gesondheid in ‘n verklaring gesê.

Die hoeveelheid gevalle wat aangemeld is, het Donderdag aansienlik gestyg toe gesondheidsbeamptes gesê het dat 333 nuwe gevalle opgemerk is.

Owerhede het voorstelle van ‘n nuwe gesondheidsnoodsituatie van die hand gewys, maar het in Desember nuwe gevalle begin monitor.

Die eerste uitbraak van die H1N1-virus was in April 2009 in Mexiko en Amerika. Dit het spoediglik ‘n wêreldwye pandemie geword en die lewens van 17 000 mense geëis.

In Mexiko alleen is meer as 1 250 mense weens varkgriep dood.

Die Wêreldgesondheidsorganisasie het in 2010 verklaar dat die pandemie verby is nadat die griep weer na ‘n tipiese seisoenale patroon teruggekeer het.

– Volg Nuus24 op Twitter.
 

- Sapa - AFP