VSA waarsku teen terreur in Europa
2010-10-04 08:35
Washington – Pres. Barack Obama se regering het Amerikaners Sondag teen moontlike terreuraanvalle in Europa gewaarsku.
In ’n amptelike verklaring word Amerikaners wat in Europa woon of reis aangeraai om op hul persoonlike veiligheid te let omdat “onlangse inligting suggereer dat Al-Kaïda en geaffilieerde organisasies hul terreuraanvalle mag voortsit”. Die verklaring verwys spesifiek na openbare vervoerstelsels en ander toerisme-infrastrukture.
Brittanje het sy reisadvies vir Frankryk en Duitsland opgradeer en gewaarsku dat die terreurgevaar daar “hoog” is. Voorheen was dit “algemeen.”
Die terreurgevaar in die Verenigde Koninkryk bly onveranderd as “erg”, wat beteken ’n aanval is hoogs waarskynlik.
Amerikaanse en Europese veiligheidskundiges is al dae lank besorgd dat terroriste dalk aanvalle soos die noodlottige skietery in 2008 in Moembaai, Indië, beplan.
“Dit is nodig dat die Franse weet die gevaar bestaan en kan ons enige oomblik tref,” het die Franse minister van verdediging, Herve Morin, in Le Parisien gesê.
Amerikaanse veiligheidsamp- tenare glo Osama bin Laden sit agter die terreurplanne.
Volgens ’n Pakistanse veiligheidsamptenaar is agt Duitsers en twee Britte glo die middelpunt van ’n terreurplan.
Die verdagtes skuil glo in Noord-Waziristan, ’n Pakistanse stamgebied waar talle militante saamgetrek is.
Volg Nuus24 op Twitter.
- Die Burger Oos