VSA ‘waaksaam ná dreigement’
2011-09-10 08:24
Washington - Pres. Barack Obama het opdrag gegee dat teenterreurmaatreëls in Amerika verskerp word ná ’n “geloofwaardige, maar onbevestigde” dreigement in aanloop tot môre se tiende herdenking van die 9/11-terreuraanvalle.
Amptenare wat op voorwaarde van anonimiteit gepraat het, het gesê die dreigement het betrekking op Washington en New York, wat op 11September 2001 in die Al-Kaïda-aanvalle in die visier was. Byna 3 000 mense is tóé dood.
’n Teenterreurbeampte het gesê inligting dui op moontlike motorbomaanvalle. Hy het bygevoeg dat die inligting van Pakistanse stamgebiede afkomstig is.
’n Soektog is na twee of drie verdagtes gelas wat volgens ’n bron glo bande met Al-Kaïda het.
Die burgemeester van New York, Michael Bloomberg, het benadruk dat die dreigement nie bevestig is nie, ondanks sy aankondiging van verskerpte veiligheidsmaatreëls.
Bloomberg het mense gevra om verdagte of gevaarlike bedrywighede aan te meld. “Ons moet almal die volgende drie dae ons oë oophou.”
Obama is Donderdagoggend reeds oor die moontlike dreigement ingelig.
“Die president het die teenterreurgemeenskap beveel om hul pogings te verskerp in reaksie op die geloofwaardige, maar onbevestigde dreigement,” het ’n beampte in die Withuis gesê.
’n Withuis-woordvoerder, Jay Carney, het aan MSNBC-TV gesê “ons is hiperwaaksaam ná die dreigement”.
Dokumente wat ná die dood van Osama bin Laden in sy huis in Abbottabad in Pakistan gevind is nadat hy in Mei in ’n Amerikaanse klopjag doodgeskiet is, benadruk dat hy steeds daarin belang gestel het om Amerika tydens die 9/11-herdenking te val.
Dit is nie duidelik of die planne ooit meer as net planne geword het nie.
Die kommissaris van die New Yorkse polisie, mnr. Ray Kelly, het gesê meer drasakke sal op die moltreinstelsel deursoek word, en toerusting wat bestraling monitor en snuffelhonde sal ingespan word.
“Daar word meer op tonnels, brûe en infrastruktuur in die algemeen gefokus, sowel as bekende bakens, plekke van aanbidding en staatsgeboue,” het Kelly gesê.
– Die Burger
– Volg Nuus24 op Twitter
- Reuters