VSA spreek kommer uit oor Mianmar-geweld

2013-01-03 16:22

Washington – Die VSA het Woensdag gesê hy is baie bekommerd oor lugaanvalle teen rebelle in Mianmar.

Gevegte tussen Mianmar se weermag en die rebelle in die land het die afgelope paar dae vererger. Die weermag het swaarder aanvalle begin uitvoer om beheer oor 'n basis te kry wat deur rebelle ingeneem is.

“Ons neem daarvan kennis dat die regering vandag erken het dat hy lugaanvalle in die Kachin-staat uitgevoer het,” het Victoria Nuland, ‘n regeringswoordvoerder vir die VSA, gesê.

“Ons is baie bekommerd oor die toenemende geweld.”

“Ons moedig die regering van Mianmar en die rebelle in die land aan om hierdie geweld te staak.”

Duisende mense is sedert Junie 2011 dakloos gelaat ná ‘n 17 jaar lange skietstilstand tussen die rebelle en die regering tot ‘n einde gekom het.

Die rebelle dring aan op meer politieke mag en vra dat die weermag beweerde menseregteskendings moet stopsit.

– Volg Nuus24 op Twitter
 

- Sapa - AFP