VSA praat met Bin Laden se 'vyandige' vroue
2011-05-13 09:52
Washington – Die Amerikaanse intelligensiedienste het drie van Osama bin Laden se weduwees ondervra, het CNN Donderdag berig.
Die vroue is in aanhouding geneem tydens ‘n klopjag waarin die Al-Kaïda-leier deur Amerikaanse troepe doodgeskiet is.
Alhoewel die VSA gehoop het om die vroue een vir een te ondervra, is die weduwees glo as ‘n groep ondervra.
CNN berig dat die vroue openlik “vyandig” was teenoor die Amerikaanse beamptes wat hulle ondervra het. Die nuusbron het ‘n Pakistanse regeringsbeampte en twee Amerikaanse beamptes aangehaal.
Die oudste van die vroue het tydens die onderhoud namens die hele groep gepraat. Die onderhoud is ook deur lede van Pakistan se intelligensiediens bygewoon.
Lede van beide regerings het aan CNN gesê dat daar effense spanning tussen die twee bondgenote was nadat die wêreld se mees gesoekte man tydens ‘n aanval in Pakistan doodgeskiet is.
Die Withuis het ‘n beroep op Islamabad gedoen om Amerikaanse ondersoekbeamptes toegang tot die drie weduwees te gee sodat toenemende wantroue geëlimineer kan word.
Pakistanse beamptes het die klopjag veroordeel, maar ontken dat hulle Bin Laden skuiling in hul land gebied het.
Daar word beweer dat die vroue belangrike inligting oor Bin Laden en sy terreurnetwerk kan hê.
Bin Laden is na bewering die meesterbrein agter die 9/11-aanvalle waarin sowat 3 000 mense dood is.
Volg Nuus24 op Twitter.
- Sapa - AFP