VSA: Leeu breek jong vrou se nek in aanval
2013-03-08 12:46
Dunlap – ‘n Vou wat by ‘n private dieretuin in Kalifornië gewerk het, is dood nadat ‘n leeu uit ‘n hok ontsnap en haar aangeval het terwyl sy die dier se kamp skoongemaak het, het beamptes Donderdag gesê.
David Hadden, die lykskouer, het gesê Dianna Hanson, ‘n 24-jarige intern wat deur haar pa beskryf is as ‘n “vreeslose” liefhebber van groot katte, is op die toneel dood nadat die vyfjarige leeu haar nek gebreek het.
Hanson het vir twee maande as ‘n intern by Cat Haven, ‘n 40 hektaar eksotiese dieretuin oos van Fresno, Kalifornië, gewerk.
Die groot kamp waar Hanson dood is, het ‘n kleiner hok waar diere gevoer of toegemaak kan word terwyl die groter kamp skoongemaak word.
Die leeu, wat as Cous Cous bekendstaan, kon daarin slaag om die hek van die hok oop te kry, het Hadden aan ondersoekbeamptes gesê.
“Die leeu is gevoer en die jong vrou het die groot kamp skoongemaak, terwyl die leeu in die kleiner hok was. Die hek van die hok was gedeeltelik oop en die leeu het dit met sy poot opgelig,” het Hadden gesê. “Hy het op die jong vrou afgestorm,”
Hanson se pa het gesê sy dogter se doel was om by ‘n geakkrediteerde dieretuin met groot katte te werk en sy is dood terwyl sy iets gedoen het waarvoor sy lief was.
Die leeu is doodgeskiet nadat werkers nie daarin kon slaag om die dier van Hanson se liggaam weg te lok nie.
– Volg Nuus24 op Twitter
- AP
