VS druk Noord-Korea vir ontwapening
2011-07-29 18:38
New York – Amerika het hernude druk op Noord-Korea
geplaas om “konkrete en onomkeerbare” stappe te neem om sy kernwapens op te gee
tydens samesprekings tussen die twee lande.
Verteenwoordigers van die Amerikaanse departement van buitelandse sake het gesê
die eerste twee dae van die samesprekings in New York was “ernstig en saaklik”.
Noord-Korea se verteenwoordiger het die atmosfeer as “konstruktief” beskryf.
Hoewel Amerika benadruk het Noord-Korea moet sy kernwapens
prysgee as die spanning van die afgelope ses dekades tussen die twee lande
beëindig moet word, is dit nie bekend of Noord-Korea enige eise gestel het nie.
Amerika se spesiale verteenwoordiger in Noord-Korea, Stephen
Bosworth, en Noord-Korea se adjunkminister van buitelandse sake, Kim Kye-Gwan
het vir bykans vyf uur vergader.
“Die atmosfeer was goed, die vergadering was konstruktief en
interessant. Ons het ons sieninge oor algemene kwessies verruil,” het Kim
gedurende ‘n breuk gesê.
– Volg Nuus24 op Twitter.
- SAPA