VN sluit kantore na bomaanval
2009-10-05 12:48
Islamabad – Die VN het al sy kantore in Pakistan gesluit nadat ‘n selfmoordbomaanval Maandag vier mense se lewens by die Wêreldkosprogram (WFP) -kamp in sentraal Islamabad geëis het, het ‘n woordvoerder van die VN gesê.
“Al die VN-kantore in Pakistan is gesluit tot verdere kennisgewing,” het Susan Manuel gesê.
Ishrat Rizvi, ‘n ander VN-woordvoerder, het gesê dat die kantore “vir sekuriteitsredes”: gesluit is.
‘n Selfmoordbomaanvaller het vroeg Maandagoggend in die versterkte kantore van die WFP in Islamabad ingestap, het polisie gesê.
Drie mense van Pakistan en een man van Irak is in die ontploffing dood.
Amir Abdulla, die adjunk-uitvoerende direkteur van die WFP het in ‘n verklaring gesê dat die ontploffing ‘n “verskriklike tragedie” is.
Dit is die tweede keer hierdie jaar wat die VN-gemeenskap in Pakistan getref word.
Twee werkers van die vlugtelingsagentskap VNHKV en agentskap vir kinders UNICEF is in Junie dood in ‘n selfmoordaanval by ‘n luukse hotel in noordwes Peshawar.
- Sapa-AFP