VN-hoof pleit oor klimaat
2009-11-30 09:12
Elise Tempelhof
Johannesburg – “Staan asseblief saam. Die wêreld het ’n verenigde stem teen weghol-klimaatsverandering nodig.”
Só het Ban Ki-moon, sekretaris-generaal van die Verenigde Nasies (VN), Sondag in ’n verklaring gepleit.
Die verklaring kom terwyl minstens 80 wêreldleiers, insluitend pres. Barack Obama van Amerika, gereed maak om vandag oor presies ’n week in Kopenhagen, Denemarke, saam te trek vir die grootste klimaatberaad in die geskiedenis.
Ban het aan regeringsleiers en lande se ministers van omgewingsake wat van 7 tot 18 Desember in Kopenhagen bymekaar kom om ’n nuwe klimaatooreenkoms te sluit, gesê dit is waarskynlik hul “heel laaste kans” om noodsaaklike wysigings aan die Kioto-verdrag aan te bring en só “weghol-klimaatsverandering” te keer.
Intussen het pres. Jacob Zuma Vrydag in bilaterale samesprekings met die Franse leier, pres. Nicolas Sarkozy, op ’n vergadering van staatshoofde van die Gemenebes in Trinidad en Tobago gesê Suid-Afrika sal sy deel doen om sy eie uitlaatgasse te bekamp.
Die ontwikkelde lande sal hulle egter moet verbind tot “drastiese verlagings van kweekhuisgasse”.
Suid-Afrika meen ook die ooreenkoms moet wetlik afdwingbaar wees.
Zuma het voorts gesê die Suid-Afrikaanse afvaardiging sal hom aanstaande week in Kopenhagen beywer vir ’n ooreenkoms wat die verskille in verantwoordelikhede tussen ontwikkelde en ontwikkelende lande sal erken.
Suid-Afrika sal voorts ’n ooreenkoms steun waarin genoeg geld (deur ontwikkelde lande) bewillig word sodat arm lande dit kan gebruik om by klimaatsverandering te kan aanpas.
“Die (nuwe) multilaterale klimaatsooreenkoms moet oplossings bied vir die huidige uitdagings en toekomstige krisisse wat op ons vasteland wag,” het Zuma gesê.
Die nuwe klimaatooreenkoms wat (hopelik) aanstaande week bereik gaan word, moet arm lande, veral in Afrika, help om hul ekonomieë te bou op skoon energie sodat gevaarlike uitlaatgasse vermy kan word, het Zuma gesê.
Ban het wêreldleiers voorts gewaarsku om nie verwagtinge te koester dat “ ’n perfekte ooreenkoms” bereik gaan word nie.
“As julle gaan wag vir ’n perfekte ooreenkoms, gaan die hele beraad dalk misluk. Werk liewer om ’n ooreenkoms te bereik wat regverdig is.
“ ’n Ooreenkoms met gebreke, is beter as geen ooreenkoms nie,” het hy gesê.
Ban het gesê al is die ooreenkoms wat bereik word, nie wetlik afdwingbaar nie, kan dit die raamwerk skep vir ’n toekomstige wetlik afdwingbare verdrag.
Reuters berig Obama sal hom op 9 Desember in Kopenhagen by ander regeringshoofde aansluit. Hy sal die volgende dag sy Nobel-vredesprys in die naburige Oslo, Noorweë, ontvang, waarna hy kort daarna na Kopenhagen sal terugkeer en aan die klimaatonderhandelinge sal deelneem.
- Volksblad