'Uiterste verwoesting' ná tornado 3 eis in NS

2012-12-06 08:03

Auckland – 'n Tornado het Donderdag in Auckland drie lewens geëis en "uiterste verwoesting" gesaai deur huise uitmekaar te ruk en kitsvloede te veroorsaak.

Die storm, wat met winde van meer as 110 km per uur gepaardgegaan het, het in die middag deur Hobsonville getrek, waar dit bome ontwortel het en huise se dakke afgeruk het.

Die departement van verdediging het bevestig dat drie mense dood is. Sewe is in hospitale opgeneem.

Twee van die sterftes is veroorsaak toe 'n betonblad op die stuurkajuit van 'n vragmotor beland het. Die ander is veroorsaak deur 'n boom wat omgeval het.

Sowat 150 huise is erg beskadig, en baie is onbewoonbaar. Inwoners is gedwing om by 'n nabygeleë lugmagbasis skuiling te vind.

Suzanne McFadden, 'n inwoner, het gesê die storm het deur die gebied getrek in "vyf minute van uiterste verwoesting".

"Dit lyk eerlikwaar of 'n bom in die straat ontplof het," het sy gesê.

– Is jy in die omgewing, of het jy familie in Hobsonville? Stuur jou storie of foto's aan ons, of laai dit hier.

– Volg Nuus24 op Twitter.

- AFP