Tydbom verwoes hotel in Pakistan
2011-08-15 09:03
Quetta – ’n Bom wat aan ’n tydhouer vas was, het Sondag ’n tweeverdiepinghotel in Dera Allah Yar in die provinsie Baluchistan in die suidweste van Pakistan in puin gelê.
Jawed Iqbal Gharshin, polisiehoof van die distrik Jafferabad, het gesê 12 mense het in die voorval gesterf en 23 is beseer. Die polisie hou twee mense aan wat in die hotel tee gedrink het en dit net voor die ontploffing verlaat het.
Niemand het nog verantwoordelikheid vir die bomaanval aanvaar nie.
Baluchistan loop al dekades lank onder na- sionaliste deur wat ’n groter deel van die streek se natuurlike hulpbronne wil hê.
Daar word ook geglo dié provinsie, wat langs Afganistan geleë is, is die tuiste van Talibanlede. – Sapa-AP
Volg Nuus24 op Twitter.
- Volksblad