Twee van katolieke skool vas oor seks

2011-04-07 23:00

Hackensack (New Jersey, Amerika) - Twee werknemers van ‘n Rooms-Katolieke skool in New Jersey het onskuldig gepleit op aanklag daarvan dat hulle seks met skoolmeisies gehad het tydens ‘n hoërskool se klasbesoek aan Duitsland.

Die 31-jarige Artur Sopel was adjunkhoof van operasies by die Paramus Katolieke Hoërskool en die 27-jarige Michael Sumulikoski was ‘n plaasvervanger-onderwyser en assistent-sokkerafrigter voordat hulle verlede maand geskors is.

Sumulikoski word daarvan beskuldig dat hy seks met ‘n skoolmeisie gehad het tydens die besoek in Februarie.

Sopel word daarvan aangekla dat hy aan “seksuele aktiwiteite” met twee skoolmeisies in Duitsland deelgeneem het en dat hy seks met ‘n ander skoolmeisie in 2010 gehad het.

Albei word aangekla van seksuele aanranding en dat hulle kinders in gevaar gestel het.

Sumuliksoki se regsverteenwoordiger het aan die Record-koerant gesê hy ondersoek of New Jersey seggenskap het oor dade wat na bewering in Duitsland plaasgevind het.

Die meisies se ouderdomme is nie deur die owerhede bekend gemaak nie.

- Volg Nuus24 op Twitter
 

- Sapa - AP