Twee stappers vermis in die Alpe

2012-01-09 22:09

Grenoble, Frankryk – ‘n Jong Russiese paartjie word vermis en is moontlik dood nadat hulle meer as ‘n week gelede glo probeer het om Mont Blanc in gure weer uit te klim, het Franse reddingsamptenare Maandag gesê.

Die Franse polisie is eers op 7 Januarie in kennis gestel van Tatyana Zakharova and Mikhail Zakharov se verdwyning, toe hul familie hulle gekontak het nadat die paartjie, wat in hul dertigs is, nie soos beplan teruggekeer het na Rusland nie.

Die twee is laas op 29 Desember gesien by ‘n kabelkarstasie 1 800 meter bo seespieël in Houches, naby die begin van die standaard-roete vir klimmers wat Mont Blanc, die hoogste piek in die Alpe, wil uitklim.

Lt. Emmanuel Vegas het gesê ‘n helikopter is uitgestuur om die omgewing te deursoek, maar om twee mense in so ‘n terrein te vind is “soos om ‘n naald in ‘n hooibaal te vind”.

– Volg Nuus24 op Twitter

 

- AFP