Twee soldate sterf toe selfmoordaanval skeefloop

2012-12-05 08:52

Peshawar, Pakistan – Twee selfmoordaanvallers het Woensdag Pakistan se hoof-weermagbasis aan die grens met Afganistan geteiken, het amptenare gesê.

Twee soldate het in die aanval omgekom en 'n tydelike hospitaal is beskadig.

Twee selfmoordaanvallers het 'n dubbelkajuitvoertuig bestuur na die ingang van die basis, sewe kilometer noordwes van Wana, die hoofdorp in Suid-Waziristan.

"Twee selfmoordbomaanvallers het in 'n voertuig wat met plofstof gelaai is, probeer om die Zarai Noor-basis te teiken. Die soldate het die motor 100 meter van die kamp af raakgesien. Albei aanvallers is in die voertuig opgeblaas en twee soldate is ook dood," het die amptenaar gesê.

Die distrik se administrasiehoof het gesê die voertuig het in 'n versperring naby die basis vasgejaag.

"Twee selfmoordbomaanvallers het die versperring by die hoofhek van die basis met hulle voertuig getref. Die hek en 'n klein hospitaal in die kamp is in die aanval beskadig," het Shahid Ullah aan AFP gesê.

– Volg Nuus24 op Twitter.

- AFP