Twee oumas trou in New York
2011-07-25 09:00
Niagara Falls – Twee vroue, albei oumas, het Sondag die Amerikaanse deelstaat New York se eerste wettig getroude paartjie van dieselfde geslag geword.
New York is die sesde Amerikaanse deelstaat om gay-huwelike te wettig.
Kitty Lambert (54) en Cheryle Rudd(53) is kort ná middernag op die Luna-eiland in die Niagara Falls Nasionale Park getroud.
Die vroue, met vyf volwasse kinders uit vorige huwelike, is omring deur vriende, familie, ondersteuners en selfs ’n groep toeriste.
Hulle is reeds langer as ’n dekade ’n paartjie.
Die burgerlike seremonie is voorafgegaan deur ’n Joodse, Baptiste- en episkopale diens kort voor middernag en is behartig deur die burgemeester van Niagara Falls, Paul Dyster.
Ná die seremonie het die vroue op die verhoog op maat van Lady Gaga se The Edge of Glory gedans.
Toeriste wat toevallig in die omgewing van die troue was, was ingenome met die nuus.
“Dis nogal cool,” het die Australiër Andrew Holder opgemerk. “Jy kom om die waterval te sien en dan sien jy geskiedenis.”
’n Regter het ingestem om die gebruiklike wagperiode van 24uur vir die vroue se huwelikslisensie op te hef sodat hul huwelik amptelik kon wees die oomblik toe hulle mekaar die ja-woord gee en die deelstaat se wet van krag word.
Meer as 40 ander gay paartjies gaan vandag die knoop hier deurhak. Die verwagte toename in gay-huwelikseremonies reg oor New York laat huweliksburo’s skarrel vir personeel om die seremonies te behartig en regters om dit te bekragtig.
Dyster skat die wettiging van gay-huwelike kan die deelstaat se sukkelende ekonomie oor die volgende drie jaar ’n inspuiting van $400 miljoen (sowat R2,7 miljard) gee.
Burgerregte-aktiviste meen New York se wettiging van gay-huwelike is ’n boodskap aan die Amerikaanse kongres om die wet wat die huwelik omskryf, aan te pas om getroude gay-paartjies in te sluit by federale voordele. – Reuters
Volg Nuus24 op Twitter.
- Die Burger