Twee in tronk ná aanranding van krokodil
2009-11-26 12:45
Dhaka, Bangladesj – Twee mans is in die suidweste van Bangladesj tronkstraf opgelê nadat hulle ‘n swanger krokodil erg aangerand het.
Regter Abdus Salam Khan het die mans skuldig bevind op aanklagte dat hulle die krokodil gemartel het. Hulle is Dinsdag twee jaar tronkstraf opgelê.
Die krokodil, Pipil, is ernstig beseer. Sy het een oog verloor nadat die mans haar met bamboesstokke geslaan het.
Die mans het onskuldig gepleit.
Die oord waar die krokodil woon, huisves ongeveer 12 krokodille in ‘n dam, waar mense hulle kan voer en dophou.
Die mans was deel van ‘n groep wat geld by mense wat die krokodille wil besigtig, gekollekteer het. Hulle is egter daarvoor bekend dat hulle krokodille slaan as hulle nie op hul stemme reageer nie.
Volgens plaaslike owerhede het vyf krokodille wat deur die groep mishandel is, reeds in die laaste tien jaar gesterf.
Krokodille in die omgewing word beskerm deur die wet, en oortreders kan tot vyf jaar tronkstraf opgelê word, indien hulle die diere mishandel of doodmaak.
- Sapa-AP