Twee betogers doodgeskiet in Jordanië

2012-08-25 15:49

Amman - Twee mense is dood in skermutselings tussen polisiebeamptes en gewapende betogers in die Jordaniese dorp Maan, het die nuusagentskap Petra Saterdag berig.

Sowat 200 betogers het Vrydagaand 'n optog bygewoon vir die vrylating van twee Jordaniërs wat in die buiteland gevange gehou word.

Volgens internetbronne in Jordanië is die optog glo deur Islamitiese ekstremiste gereël om die vrylating van mede-militante in Irak en Jemen te eis.

Hulle het na die sekuriteitsmag se hoofkwartiere op die dorp gestap, waar die skietery uitgebreek het, het Petra berig.

Volgens die nuusagentskap het die betogers eerste gevuur, en 'n sekuriteitswag ernstig gewond. Die wagte het teruggeskiet en twee betogers gedood.

Islamitiese ekstremiste skep gereeld konflik in die dorp, sowat 200 km suid van Amman.

Volg Nuus24 op Twitter.

- SAPA