Twee aangekeer vir dieremishandeling-videos
2011-08-04 20:10
Manila – Die Filippynse polisie het ‘n paartjie in hegtenis
geneem wat talle videos van tienermeisies wat diere martel op die Internet
gepubliseer het.
Vicente Ridon en sy vrou Dorma Ridon sal in San Fernando
verhoor word nadat hulle by ‘n gehuurde huis in ‘n afgeleë plattelandse dorpie
vasgestrek is, het senior inspekteur Martin Ngadao, die plaaslike polisiehoof,
gesê.
“Ons het hulle twee dae gelede gevang, maar hulle is reeds
op borgtog vrygelaat,” het Ngadao gesê.
Die saak het ontstaan na ‘n jare lange ondersoek deur die diereregte-organisasie, Peta, na die verkoop van sogenaamde “crush”-videos
in Internet-kletskamers.
Nadat Peta die misdade by owerhede aangemeld het, het die
polisie die Ridon-paartjie van wreedheid teenoor diere, kindermishandeling en
mensehandel aangekla.
Die paartjie het egter gevlug voor die polisie hulle kon
aankeer.
Peta het toe ‘n beloning van sowat R16 000 aangebied vir
inligting wat tot die twee se in hegtenisneming sou lei.
“Die ‘crush’-videos beeld uitermatige wreedheid teenoor
diere uit, insluitende ‘n konyn waarvan die vel van sy lyf af gesny word terwyl hy
nog lewe. Die konyne skarrel en skree terwyl hul ore afgesny word en hulle aan
die brand gesteek word,” het ‘n Peta-verklaring gelui.
Hoewel dit die eerste “crush”-videos is wat in die Filippyne
gevind is, was daar die afgelope paar jaar verskeie polisie-klopjagte op
operasies waarin vroue en meisies seksdade voor die kamera pleeg vir
oorsese Internet-kliënte.
– Volg Nuus24 op
Twitter.
- AFP