Tutu ontmoet Suu Kyi, hoop vir vry Mianmar

2013-02-26 16:53

Yangon – Emeritus-aartsbiskop Desmond Tutu het Dinsdag tydens ‘n ontmoeting met Aung San Suu Kyi gesê hy hoop om ‘n “waarlik vrye” Mianmar te sien.

Die twee Nobelpryswenners het gekuier tydens Tutu se besoek aan die land.

Tutu het gesê hy is “verheug” om Suu Kyi te ontmoet vir privaat gesprekke by die herehuis langs ‘n meer in Yangon waar die aktivis vir jare opgesluit was tydens haar stryd vir demokrasie wat byna twee dekades geduur het.

“Dit is wonderlik om hier te wees en haar te sien. Ons sien uit daarna om julle land werklik vry te sien,” het hy aan verslaggewers gesê wat by die woning saamgekom het.

“Die potensiaal van hierdie land is groot en ons wil sien hoe die potensiaal ten volle ‘n werklikheid word,” het hy gesê. Tutu het verder ook gevra dat ‘n einde gebring moet word aan die etniese konflik in die land.

Voortdurende gevegte tussen die weermag en Kachin-rebelle in die noorde en sektariese geweld in die westelike Rakhine-staat het tienduisende mense verplaas en Mianmar se politieke hervormings oorskadu.

Tutu, wat nie beplan om enige regeringsbeamptes tydens sy besoek te ontmoet nie, het sy hoop uitgespreek dat Mianmar “werklik demokraties” sal word.

– Volg Nuus24 op Twitter

- AFP