Tussentydse regering vir Griekeland gou bekend
2011-11-09 09:05
Athene – Die tussentydse regering in Griekeland sal Woensdagmiddag bekendgemaak word, sowel as die naam van die nuwe premier, het ‘n woordvoerder vir die bestaande Sosialistiese regering, Giorgos Elenopoulos, gesê
‘n Aankondiging was teen Dinsdag verwag, maar ‘n nood-kabinetsvergadering wat deur die premier, George Papandreou, saamgeroep is, het geëindig sonder enige definitiewe aankondigings.
Die voormalige vise-president van die Europese Sentrale Bank, Lucas Papademos, is die gunsteling om as die land se nuwe premier aangewys te word.
Tog het die koerant To Vima laat Dinsdagaand op sy webwerf gesê dat daar komplikasies is.
Die Sosialiste het glo daarop aangedring dat die huidige president in die parlement, Filippos Petsalnikos, eerder as premier gekies moet word.
Volgens mediaberigte is die rede vir Papademos se teenkanting dat hy daarop aandring dat hy nie ‘n eerste minister wil wees wat beheer word deur die twee groot Griekse partye, die Sosialiste en die Konserwatiewe Party, nie.
Papademos het glo ook aangedring op meer tyd om die besparing- en stabiliseringsplan te implementeer.
Hy het glo aangedui dat hy dit nie teen 19 Februarie, die datum wat beplan word vir nuwe verkiesings, uitgevoer sal hê nie.
Ander gunstelinge wat as kandidate vir die tussentydse premier voorgestel word is die verteenwoordiger van die Internasionale Monetêre Fonds, Panagiotis Roumeliotis en die ombudsman van die Europese Unie, Nikiforos Diamantouros.
– Volg Nuus24 op Twitter
- Sapa-DPA