Tronkstraf vir man wat kind vir seks betaal

2012-09-14 23:00

Phnom Penh – ‘n Hof in Kambodja het Vrydag ‘n 81-jarige Switserse man tot vyf jaar tronkstraf gevonnis nadat hy betaalde seks met ‘n 13-jarige seun gehad het, het sy prokureur en ‘n kinderregte-groep gesê.

Hugo Leuthold, wat reeds vantevore in Kambodja in die tronk was op soortgelyke aanklagte, is in Maart in die hoofstad Phnom Penh in hegtenis geneem.

“Die munisipale hof in Phnom Penh het hom tot vyf jaar tronkstraf gevonnis en het beveel dat hy uit die land gedeporteer word nadat hy sy vonnis uitgedien het,” het Leuthold se prokureur, Dun Vibol, aan AFP gesê.

Hy het bygevoeg dat sy kliënt die aanklagte ontken en dat hy teen die vonnis sal appelleer.

Die menseregtegroep Action Pour Les Enfants (APLE) sê dit is Leuthold se tweede skuldigbevinding vir seksmisdade in Kambodja nadat hy twee jaar tronkstraf opgelê is vir die seksuele mishandeling van vier seuns in 2010.

Hy het slegs 10 maande se tronkstraf uitgedien, het APLE gesê en het bygevoeg dat daar geen besonderhede is oor waarom hy nie gedeporteer is ná sy vrylating nie.

Die hof het hom Vrydag beveel om $500 (sowat R4 100) in skadevergoeding aan die slagoffer te betaal.

– Volg Nuus24 op Twitter


 

- Sapa - AFP