Tronk toe ná kleuter rook
2009-10-16 09:10
Londen – ‘n Britse man is ‘n vonnis van 18 maande tronkstraf opgelê nadat hy ‘n driejarige dogtertjie ‘n sigaret laat rook het.
Graeme Conroy (31) het ‘n sigaret wat reeds aangesteek was vir die driejarige gegee en haar aangemoedig om daaraan te teug, het die hooggeregshof in New Castle gehoor.
Die kleuter se naam mag weens haar ouderdom nie bekend gemaak word nie.
Conroy het ‘n 14-jarige tiener oorreed om die voorval met ‘n selfoon af te neem.
Die tiener kan gehoor word waar sy lag terwyl die kleuter liggies aan die sigaret teug. Iemand anders het glo in ongeloof gesê “sy sal die hele sigaret op haar eie rook”.
Conroy is kort daarna in hegtenis geneem nadat ‘n 16-jarige ooggetuie die voorval by die polisie aangemeld het.
"Die dogtertjie het glo vir nóg ‘n sigaret gevra en begin huil toe sy een geweier is. Hy het wel ingegee en haar nóg een gegee. Dit lyk of sy al voorheen gerook het," het dié ooggetuie gesê.
Tony Glover, aanklaer, het gesê die kleuter het altesaam vyf sigarette gerook.
Conroy het skuld beken op aanklagte van swak versorging van 'n minderjarige, verwaarlosing, en dat hy die kind aan gesondheidsrisiko's blootgestel het, het Press Association berig.
"Jy het gedink dit sal snaaks wees as die kind toegelaat word om sigarette te rook en dan het jy ook die vermetelheid om dit af te neem,” het Regter David Wood aan die beskuldigde gesê.
"Ek hoop jy besef dat dit geheel en al nie snaaks was nie.”
- Reuters