Triomfantlike Obama sê dankie

2012-11-07 08:58

(Spencer Platt, Getty Images, AFP)

Washington – 'n Triomfantlike pres. Barack Obama het by sy hoofkwartier in Chicago, Illinois, voor duisende aanhangers sy dank uitgespreek vir kiesers se vertroue in hom.

"Ons weet die beste lê nog voor vir die Verenigde State van Amerika," het hy onder luide toejuiging gesê.

"Ons is 'n Amerikaanse familie en ons almal val en staan saam."

Hy het sy Republikeinse teenstander, Mitt Romney, ook bedank vir sy insette.

"Ek het sopas met goewerneur Romney gesels en hom en Paul Ryan geluk gewens met 'n goeie verkiesingsveldtog. Ek sien ook uit om in die komende weke met Romney te gesels, om geleenthede te identifiseer waar ons kan saamwerk."

Obama het sy vrou, Michelle, uitgesonder.

"Ek sou nie die man gewees het wat ek vandag is, as dit nie was vir die vrou wat 20 jaar gelede gesê het sy sal met my trou nie. Laat ek dit in die openbaar sê: Ek was nog nooit so lief vir jou nie," het hy gesê.

"Aan die beste veldtogspan en die beste vrywilligers in die geskiedenis van die politiek... Party van julle was nuut, ander was van die begin af aan my sy. Maar julle is almal soos familie, en hierdie president sal die res van sy lewe dankbaar wees vir wat julle gedoen het," het hy gesê.

– Volg Nuus24 op Twitter.

- Nuus24