Trein tref oorlogsveterane, vier sterf
2012-11-16 13:03
Washington – Vier mense is dood en talle is beseer toe 'n trein 'n platbakvragmotor wat oorlogsveterane tydens 'n optog in Texas vervoer het, getref het.
Die vragmotor, wat deel was van 'n "Hunt for Heroes"-optog in die dorp Midland, het veterane en hul eggenote vervoer toe dit Donderdag deur die trein getref is.
Leon Panetta, die VSA se minister van verdediging, wat tans op 'n amptelike besoek in suidoos Asië is, is "bedroef oor nuus van die ongeluk waarin oorlogsveterane, helde en hul eggenote in Midland, Texas, betrokke was," het die Pentagon in 'n verklaring gesê.
Volgens die polisie is vyf mense steeds in die hospitaal, waarvan een in 'n kritieke toestand is.
Volg Nuus24 op Twitter.
- Sapa - AFP
