Tot siens, Silvio, juig duisende Italianers

2011-11-14 06:52

Johannesburg - Mario Monti (68), voormalige kommissaris van die Europese Unie (EU), sal na verwagting aangestel word as waarnemende premier van Italië nadat Silvio Berlusconi (75) Saterdag te midde van luide toejuiging amptelik as Italiaanse premier bedank het.

Pres. Georgio Napolitano het Sondag begin om ’n nuwe regering saam te stel wat Berlusconi sal opvolg en alles in die stryd sal moet werp om die land van bank­rotskap te red. Hy het ook begin om gesprekke te voer met Italië se grootste politieke partye om steun te werf vir die nuwe regering. Berlusconi het Dinsdag tydens ’n stemming in die Italiaanse parlement sy meerderheid verloor en onderneem om te bedank sodra ’n nuwe begrotingswetsontwerp deur die parlement goedgekeur is.

AFP berig duisende mense het Saterdag in Rome se strate gedans, landsvlae rondgewaai en plakkate met die woorde “Tot siens, Silvio” opgehou nadat nuus oor Berlusconi se bedanking begin versprei het. Die premier se bedanking bring ’n einde aan ’n 17 jaar lange politieke era en sal die wiele aan die rol sit vir ’n oorgangsfase en die hoop dat dit die land uit sy ekonomiese krisis sal lig.

The Guardian het Berlusconi se loopbaan Sondag as kleurvol, gebeurtenisvol, onwaarskynlik en vernietigend beskryf. “Geen Italianer het sedert Mussolini so ’n blywende indruk op die land gemaak nie. En niemand het so baie gedoen om sy land se vooruitsigte en posisie in die res van die wêreld soveel skade aan te doen nie.

”Ná weke van onsekerheid en toenemende waarskuwings van internasionale bondgenote dat dringende ingrype nodig is om die Italiaanse skuldkrisis te bestuur, het die land se skuldvlakke verlede week ’n hoogtepunt bereik met vrese dat dit die totale kontinent se ekonomie kan kelder. Berlusconi is daarvan beskuldig dat hy nie genoeg hervormings ingestel het om Italië se staat­­skuldlas te verminder nie. Die nuwe regering sal die moeilike taak hê om die land uit sy skuldkrisis te lei, berig Reuters

Pres. Barack Obama van die VSA het die naweek gesê nog baie sal gedoen moet word om beleggersvertroue in Europa te herstel en markte te oortuig dat Italië sy skuldlas sal kan finansier.“Ek dink nie ons sal reusegroei uit Europa sien totdat die probleem opgelos is nie en dit sal ’n dempende effek hê op die wêreldekonomie.”Teen druktyd het beleggers gehoop dat die nuwe regering in plek sal wees wanneer markte vanoggend heropen. 

– Volg Nuus24 op Twitter

- Reuters