Tot 60 mense dood ná grondverskuiwing
2012-01-25 15:56
Port Moresby – Byna 60 mense is moontlik dood ná ‘n groot grondverskuiwing wat ‘n hele dorp verwoes het in Papoea-Nieu-Guinee, het hulplenigingwerkers Woensdag gesê.
Die ramp het Dinsdag naby ‘n groot ExxonMobil natuurlike aardgas (LNG)-projek in die land se suidelike hooglande gebeur terwyl mense geslaap het.
Volgens plaaslike media berigte is 40 lyke reeds gevind en word 20 mense steeds vermis.
Martin Mosi, die direkteur van Papoea-Nieu-Guinee se sentrum vir natuurlike rampe, kon nie bevestig hoeveel slagoffers daar is nie.
“Die getal wissel en moet nog bevestig word, maar ja, daar kan bes moontlik slagoffers wees,” het hy gesê.
Volgens personeel van Mosi is hy onderweg na die toneel en sodra hy daar is, sal hy meer duidelikheid hê oor wat aan die gang is.
– Volg Nuus24 op Twitter.
- Sapa - AFP