Tot 5 000 van Britse weermag sal moet loop
2011-06-22 09:00
Utrecht - Die jongste reeks drastiese besnoeiings van Britse militêre uitgawes het betrekkinge tussen die regering en die weermag blykbaar nogal skade berokken.
Gister het die eerste minister, mnr. David Cameron, duidelik geïrriteerd oor ’n vraag op ’n nuuskonferensie gesê: “Daar is oomblikke dat ek wakker word en dink: ‘Weet jy wat, doen jý die bakleiwerk, dan sal ék die praatwerk doen.’”
Dit was in reaksie op uitlatings van weermaghoofde dat soldate weens die besnoeiings noustrop trek in plekke soos Libië en Afganistan.
Die lugmag se tweede in bevel, hoof-lugmaarskalk sir Simon Bryant, het in ’n vertroulike voorlegging aan die parlementêre staande komitee oor verdediging gesê die lugmag se mense is “oorwerk” en hul veglus word daardeur bedreig. Hy het bygevoeg die moreel is “broos”. Die mense voel ook die besnoeiings wys die regering waardeer nie regtig hul moeite nie.
Sy voorlegging het gister uitgelek en is op die voorblad van die Daily Telegraph gepubliseer. Die gevolg is dat die lugmag sukkel om mense te werf. By sommige afdelings is tot ’n kwart van alle poste vakant. As die Libiese operasie langer as aanstaande September duur, sal die lugmag se vermoë om onverwagse gebeure die hoof te bied “weggekalwe” word, het Bryant gesê.
Kragtens die besnoeiings moet 5 000 lede van die lugmag – 15% van die totaal – oor die volgende drie jaar afgedank word.
Bryant se reguit taal volg op soortgelyke uitlatings van adm. sir Mark Stanhope, hoof van die vloot. Stanhope het gesê as Argentinië die Falkland-eiland nou met geweld sou terugvat, sou Brittanje weens die besnoeiings “presies niks” daaraan kon doen nie.
Cameron het op sy nuuskonferensie gesê die tyd in Libië is aan Brittanje se kant en die land sal met die militêre veldtog voortgaan.
– Volg Nuus24 op Twitter.
- Die Burger