Top-dwelmbaas in Venezuela vasgetrek
2011-11-29 09:00
Bogotá – Een van Colombia se mees gesoekte misdadigers, Maximiliano Bonilla Orozco, is in Venezuela in hegtenis geneem.
Orozco, beter bekend as Valenciano, word daarvan beskuldig dat hy tonne kokaïne vanaf Colombia na die VSA gesmokkel het, het die BBC berig.
Amerikaanse beamptes het ‘n beloning van $5 miljoen (sowat R42 miljoen) aangebied vir inligting oor sy doen en late voordat hy aangekeer is.
Die Colombiaanse president, Juan Manuel Santos, het sy Venezolaanse eweknie, Hugo Chavez, vir die inhegtenisneming geprys.
Valenciano (39) word deur Colombiaanse veiligheidsmagte aangekla dat hy The Office, ‘n dwelmbende wat in die Colombiaanse stad Medellin gebaseer is, lei.
The Office was destyds ‘n gewapende vleuel van die berugte dwelmhandelaar Pablo Escobar se bende wat dwelms gesmokkel het, het Colombiaanse beamptes gesê.
Lees meer hier
Volg Nuus24 op Twitter