Toneel van vliegongeluk gefynkam
2010-05-24 06:50
Mangalore – Ondersoekers het gister nog die ongelukstoneel gefynkam waar ’n passasierstraler van Air India Express eergisteroggend van ’n aanloopbaan naby Mangalore geloop en in ’n kloof beland het.
Dit is die tweede ernstige passasierstraler-ongeluk binne tien dae.
Altesame 158 van die 166 mense aan boord van vlug IX-812 is dood. Dié sterftesyfer is hoër as die 103 mense wat dood is toe ’n Airbus A330-200 wat in Johannesburg opgestyg het op 12 Mei naby die Libiese hoofstad, Tripoli, neergestort het.
Luidens ’n verklaring van Air India is 87 van die lyke reeds aan familielede besorg.
Die Boeing 737-800, wat van Doebai na Mangalore in Indië onderweg was, het ná die landing nie betyds tot stilstand gekom nie, in ’n beboste kloof ingeploeg en aan die brand geslaan.
Van die agt oorlewendes het vertel hoe hulle ontsnap het terwyl die romp in stukke begin breek en in ’n dik rookwolk gevul is.
Talle plaaslike inwoners het hulle net ná die ongeluk, omstreeks 09:30 Suid-Afrikaanse tyd (06:00 in Indië), na die toneel gehaas om slagoffers te probeer red. Mohammed Azim het aan ’n CNN-nuuskanaal gesê: “Lyke was op mekaar gestapel.”
Beamptes het gesê die landingstoestande was taamlik goed met goeie sigbaarheid en daar was geen noodroep van die stuurkajuit nie.
Dit is die ongeluk in Indië met die hoogste dodetal sedert 1996 toe altesame 349 passasiers dood is toe twee passasierstralers naby New Delhi gebots het.
Volgens Aviation Safety Network (ASN), wat vliegongelukke wêreldwyd monitor, het die vliegtuig in Desember 2007 sy eerste vlug onderneem.
Volgens The Times of India is die vlugdata-opnemer (black box) gister opgespoor.
Dit is die tweede ernstige ongeluk met ’n Boeing 737-800 in minder as vier maande. Só ’n straler van Ethiopian Airlines het op 25 Januarie kort ná sy opstyging in Beiroet, Libanon, in die Middelandse See neergestort in wat ooggetuies as ’n vuurbal beskryf het.
Boeing het in ’n verklaring gesê hy gaan ’n tegniese span Indië toe stuur om met die ondersoek te help.
- Volksblad