Toiletpapier in Vatikaankleure te koop
2011-08-10 18:04
Madrid – Renova, een van Europa se grootste vervaardigers van papierprodukte vir huishoudelike gebruik, het ‘n toiletpapier in die Vatikaanvlag se kleure ter ere van Pous Benedictus XVI se besoek aan Spanje bekend gestel.
Elke pak van dié spesiale toiletpapier bevat twee rolle, een geel en een wit, wat ook lekker ruik.
Die maatskappy het op sy webtuiste gesê die toiletrolle kan as reusagtige papierlinte gebruik word om die 84-jarige pous op sy besoek aan Madrid welkom te heet.
“Is daar ‘n beter manier om die strate op te helder as om hierdie reuse-papierlinte met die Vatikaan se kleurskema te gebruik? Maak jou venster oop om fees te vier! Heet Pous Benedictus welkom!” lui 'n boodskap op die maatskappy se webtuiste.
Die 10 000 pakke toiletpapier wat die maatskappy vir die geleentheid vervaardig het, kos sowat R30 elk en het elkeen ‘n “I heart the Pope”-plakker met ‘n rooi hart-simbool op.
– Volg Nuus24 op Twitter.
- AFP