Toerskip wat brand na Maleisië onderweg

2012-04-01 13:27

Johannesburg – 'n Passasierskip wat onklaar geraak het nadat 'n brand aan boord uitgebreek het, is herstel en is van die Filippyne na Maleisië onderweg, het RSG Sondag berig.

 Die brand het Vrydag op die Azamara Quest uitgebreek - 'n dag nadat dit met 1 000 mense aan boord uit Manila na Maleisië vertrek het.

Volgens die skip se operateur, Azamara Club Cruises, is vyf bemanningslede vir rookinaseming behandel, maar geen passasiers is beseer nie.

Die skip sal Maleisië binne twee dae bereik.

Vroeër vanjaar is 32 mense dood toe Die Costa Concordia langs die Italiaanse kus omgeslaan het.

Nóg 'n skip - met honderde passasiers op - moes vir drie dae sonder krag klaarkom nadat 'n brand in die enjinkamer uitgebreek het.

– RSG

– Volg Nuus24 op Twitter