Tifoon: Geen hoop op oorlewendes
2012-12-11 17:50
Manila – Reddingswerkers het Dinsdag begin hoop verloor om die sowat 900 vermiste mense op te spoor nadat Tifoon Bopha verlede week die Filippyne getref het.
Die dodetal staan tans op 714.
Reddingswerkers het drie dae laas oorlewendes opgespoor en amptenare sê hulle vrees dat hulle verder net lyke sal kry.
“Ons kan nie meer sê dat ons baie oorlewendes gaan opspoor nie. Wat ons wel kan opspoor is lyke,” het Ariel Bernardo, ‘n bevelvoerder in die weermag, gesê.
“Die kanse is skraal om enige oorlewendes te kry.”
Altesaam 890 mense word nog vermis, terwyl 110 mense al gered is.
Meer as 1 900 mense is ook beseer.
Altesaam 313 van die vermiste mense is vissermanne wat op die see was toe die tifoon getref het, ten spyte van die regering se waarskuwing om nie op die water uit te gaan nie.
“Ons hoop dat baie van hulle maar net skuiling soek op eilande,” het Benito Ramos, ‘n regeringsamptenaar, gesê, maar hy het bygevoeg dat die dodetal in die volgende paar dae drasties kan toeneem.
Meer as 5,4 miljoen mense is deur die tifoon geraak.
– Volg Nuus24 op Twitter
- Sapa-DPA
