Tienerbroers aangekla van moord op 12-jarige

2012-10-24 17:50

Clayton – Twee tieners is aangekla nadat hulle na bewering 'n 12-jarige meisie na hul ouerhuis gelok en haar vermoor het, het die polisie gesê.

Inwoners van 'n klein dorp in New Jersey het franties na die kind gesoek totdat die seuns se ma die polisie ‘n leidraad oor die meisie se dood gegee het.

Autumn Pasquale se lyk is in ‘n vullisdrom gevind.

Die seuns, wat onderskeidelik 15 en 17 jaar oud is, is albei van moord aangekla.

Autumn het Saterdag verdwyn nadat sy op haar BMX-fiets gaan rondry het.

Sy is vermoedelik verwurg, het Sean Dalton, ‘n staatsaanklaer, tydens ‘n mediakonferensie gesê.

Die seuns se ma het glo die polisie gekontak nadat sy glo ‘n verdagte inskrywing op een van die seuns se Facebook-profiele gesien het.

Dalton wou nie sê wat die motief vir die moord was nie, maar het gesê dat daar geen tekens van seksuele aanranding is nie.

Dalton het ook bygevoeg dat hulle gaan probeer om die saak na ‘n volwasse hof oor te plaas.

Die seuns het hulself saam met hul prokureurs by die polisie oorgegee.

– Volg Nuus24 op Twitter
 

- AP