Tiener vermoor dokter ná broer in hospitaal sterf
2011-08-17 15:22
Hanoi – ‘n Tienerseun het ‘n dokter doodgesteek nadat sy ouer broer in ‘n hospitaal in Viëtnam oorlede is toe hy longontsteking opgedoen het, het owerhede Woensdag gesê.
Volgens die Viëtnamese polisie het die tiener ook ‘n ander dokter aangeval. Hy is ernstig gewond.
Nguyen Van Dung (18) is Dinsdag in die provinsie Thai Binh in hegtenis geneem vir die moord op Pham Duc Giau (60). Ngo Duy Hoan (30) is ernstig beseer in die voorval.
“Hy was gefrustreerd nadat sy broer oorlede is,” het Nguyen Van Hung, hoof van die polisiedepartement in die Vu Thu-distrik, gesê.
Hung sê hy was nie by die hospitaal toe die tiener se broer by die hospitaal weens longontsteking opgeneem is nie.
“Ek weet nie hoe goed die dokters hom behandel het nie,” het hy vertel.
Volgens Hung het die tiener voorheen geen misdade gepleeg nie.
Dung se 20-jarige broer is Dinsdag in ‘n kritieke toestand na die distrikshospitaal geneem.
Die tiener het glo gedreig om die mediese personeellede dood te maak indien hulle daarin sou misluk om sy broer te red.
Dung het Giau in sy bors en Hoan in sy maag gesteek toe die dokters hom en sy familie gevra het om na hul kantoor te gaan om die doodsertifikaat te teken, het owerhede gesê.
Die tiener het ná die aanval gevlug en is later in ‘n hotel in hegtenis geneem.
Volg Nuus24 op Twitter.
- Sapa-DPA