Tiener skiet ouers, drie kinders dood in VSA
2013-01-21 09:44
Albuquerque – ‘n Vyftienjarige seun is in aanhouding terwyl speurders probeer vasstel wat daartoe gelei het dat hy sy ouers en drie van hul kinders doodgeskiet het.
Die vyf slagoffers se lyke is in ‘n huis in Nieu-Mexiko gevind.
Die tiener is op onder meer aanklagte van moord in hegtenis geneem ná die skietery, wat Saterdagaand by die huis in ‘n plattelandse gebied suidwes van Albuquerque plaasgevind het, het lt. Sid Covington Sondag gesê.
Beamptes het die slagoffers Sondag geïdentifiseer as Greg Griego (51), sy vrou Sara Griego (40) en drie van hul kinders – ’n negejarige seun, Zephania Griego en twee dogters, Jael Griego (5) en Angelina Griego (2).
Griego was ‘n geestelike leier wat bekend was vir sy werk onder brandweerbeamptes en hy het 13 jaar lank as ‘n kapelaan by die tronk gewerk.
“Kapelaan Griego was ‘n toegewyde professionele man wat sy medemens en die brandweerbeamptes van hierdie gemeenskap met passie gedien het,” het die brandweerhoof, James Breen, in ‘n verklaring gesê.
“Sy kalm gees en sagte geaardheid sal gemis word.”
Die moorde kom slegs drie dae nadat pres. Barack Obama ‘n rits voorstelle vir wapenbeheer gemaak het. Dit is die mees omvattende poging in byna twee jaar om wapenwette in die VSA te versterk.
Dit volg ná die skietery in Connecticut in Desember, waar ‘n gewapende man 20 kinders en ses volwassenes by 'n skool doodgeskiet het.
– Volg Nuus24 op Twitter
- Sapa - AP
