Tiener probeer bank beroof om van ouers te vlug
2012-09-06 22:55
Moskou – 'n Russiese tiener het probeer om 'n bank in die stad van Izhevsk te beroof as deel van 'n plan om van die huis af weg te loop en selfmoord te pleeg, het ondersoekbeamptes Donderdag gesê.
"Die meisie, wat 'n masker gedra en met 'n mes gewapen was, het haar plan by een van die stad se kommersiële banke uitgevoer, met die doel om geld te steel, maar is deur die bank se sekuriteitswagte gekeer," het die ondersoekkomitee gesê.
Die 14-jarige het aan ondersoekbeamptes gesê sy het die aanval uitgevoer met die doel om van haar ouers se "uitermatige beheer" te ontsnap.
"Die meisie wou die geld gebruik en die stad verlaat en dan later selfmoord pleeg," het die ondersoekbeamptes gesê.
Sy het geskree dat sy 200 000 roebels (sowat R51 0000 kontant wil hê. Die kind was 'n topleerder, maar was ongelukkig om saam met haar ma en stiefpa te woon, het 'n plaaslike koerant berig.
Die meisie is vrygelaat nadat sy beloftes onderteken het om nie die stad te verlaat nie en haar te gedra.
In Rusland kan minderjariges tussen die ouderdomme van 14 en 16 tronkstraf opgelê word indien hulle ernstige misdade pleeg – al is dit 'n eerste oortreding.
– Volg Nuus24 op Twitter
- AFP
